تسجيل
مراجعة كتب, مقال, مميز

الكلام الكبير في كتاب الأب الغني والأب الفقير – مراجعة مرحة (حلقة 1)

وقت القراءة : 5 د
قُرِأ النص 5874 مرة
4 تعليقات

بص يا عم الحج،

كتير مننا محتار ومخه بيلف ويدور بخصوص حياته المهنيه والماليه والعائليه والملوخية. وصباح الهرس الذهني والاكتئاب والأورام النفسيه اللى بتضرب فى الدماغ زى الشواكيش. وطبعاً يا عزيزي البرنس ويا عزيزتي البرنسيسة. كلنا مر ويمُر ويدوق المُر من هؤلاء الأشياء مضروبة مع بعضها فى خلاط البلاوي اللى بتتحدف علينا. يا فتاح يا عليم يا رزاق يا كريم.

بص تانى يا برنس الليالى، أحكيلك حكاية. بعدين نخش فى الموضوع…اقعد مكانك!..اه..حنرغى شوية و نشوف علاج للأورام النفسية فى البحث عن حلول لشوية من مشاكل حياتنا. بدل م سعتك عمال تقرأ بوستات في الهلس وخلافه…

الزمان: من حوالي تلات سنين أو أربع سنين.
المكان: الشغل! شوية المكاتب اللى وشها للحيطة والكومبيوترات اللي مش بتنطفي.
الشخصيات: العبد لله. وعبد لله تانى الله يمسيه بالخير ويعلي مزاجه. وكام واحد من الزملا بيدردشوا عن الفواتير ومصاريف المدارس والأحوال. زميل من زملاء الكفاح رشح لي كتاب إسمه بالعربي: “الأب الغنى والأب الفقير”. و بالعنجليزى: Rich dad, Poor dad

والباشا اللي كتب الكتاب ده اسمه المعلم: روبرت كيوساكي Robert Kiyosaki. جوجل عنه وشوف صورته. أمريكاني شكله أسيوي ووشه بشوش.. من كتر الفلوس اللى عنده …الحمد لله.

زميلي العزيز اللي رشحلى الكتاب ده عمل ماركتنج للكتاب بطريقة غير مباشر. “الكتاب ده جامد..جاب من الآخر فى حوارت الفلوس والتحويش والفواتير. كإنه يا معلم عايش معانا فى مصر وشايف البلاوى اللى بنشوفها.” زميلي العزيز رمى الهلب كراجل المبيعات المحترف :). وداس على زر الحاجات والإحتياجات لكل بنى آدم من سكان الكوكِب اللى اسمه مصر (بكسر الكاف التانية على طريقة حزلقوم). ومن ساعة م الراجل باع، أنا اشتريت.

بما إني مش بحب أسمع أو أقرا كلام وردي وتحفيز ماسخ. البوستات اللي بعض الناس هريانا بيها من عينة “من جد وجد ومن زرع بلح” جنب صورة لستيف جوبس أو بيل جيتس أو عنتريز قاهر المعيز، رحت منزل الكتاب. وقعدت أقرا فيه كام يوم على الموبايل طول الطريق للشغل. اللى كان طبعاً بياخدله ساعتين من العمر على أم المحور ثم المهندسين …إلخ زفت الطين إلخ زحمة !

وعشان مهريش كتير. لو عايز تعرف المعلم كيوساكى كتب الكتاب إمتى وفى أنهى قاعة وباع قد إيه والمشاريب وخلافه، روح شوف على ويكيبيديا ومتصدعش نفسك.

لكن اللى أنا عايز أشيره هنا هو الخلاصة بالعربي “الغير فصيح”…

الكتاب عشر فصول. شهيصت لك إسم كل فصل تحت بالعامية المصرية الشبراوية الاصيلة. عشان لو قررت تتابع معايا…قشطة؟ كل فصل فى اللذوذ ممكن تخلصه فى كام ساعة. لو بتحب القرايه أو مقضيها ع الفيس بوك توزع لايكات ع البشر. إضرب المقالة فى البريك، في المواصلات أو قبل م تنام عشان متضيعش وقت الشركة اللى مشغلاك أو العميل اللى باعت لك شغل وترجع تعيط ع الخصومات والعلاوات والأوفر تايم 🙁.

الفصل الاول: أبويا الغنى وأبويا الفقير
الفصل التانى: الأغنيا مش بيشتغلوا عشان الفلوس
الفصل التالت: م تتعلم ثقافة ماليه بقى!
الفصل الرابع: شوف شغلك وخلص
الفصل الخامس: حوار الضرايب واللي الشركات بتعمله
الفصل السادس: الأغنيا هم اللى اخترعوا الفلوس
الفصل السابع: اشتغل عشان تتعلم، مش عشان تجيب فلوس وخلاص
الفصل التامن: خش بقلب جامد
الفصل التاسع: طب ابتدى ازاى؟
الفصل العاشر: عايز تانى؟ اقول لسعتك ممكن تعمل ايه…

الكتاب ترجموه للغات كتيرة، وإتهرس شرح برده. بس القصة هنا إزاى ممكن الواحد يفهم ويتعلم ويركب الأفكار اللي فى الكتاب ع الأحوال اللي عايشينها في مصر والبلاد العربية مع كوباية شاى بنعناع او سندوتش فول الصباح. لو قريته قبل كده بالعربي أو بالإنجليزى يبقى قشطة. ترجم و إلحم الأحداث مع حياتك. و لو محصلكش الشرف و قريت الكتاب ده قبل كده. يبقى قشطة تاني. هى فى الأول والآخر أرزاق.

لو مندمج وعايز تعرف إزاى نظبط الدماغ بشوية كلام مفيد. حبتدى كل فصل فى كام بوست بإذن الله…

فل عليكم

#الأب_الغني_و_الأب_الفقير
#الكلام_الكبير_اللى_فى_كتاب_الاب_الغنى_و_الاب_الفقير

الجزء الثاني من هنا

ساعد الكاتب في تطوير مهاراته الكتابية

نُشرت بواسطة Ahmad Elmiligy

Ahmad Elmiligy

A time traveler, i belong to no age! i write, i design, i teach, i travel, and i rule my planet.

‏4 رأي حول “الكلام الكبير في كتاب الأب الغني والأب الفقير – مراجعة مرحة (حلقة 1)”

  1. أحمد دراغمة يقول:

    الله ينور عليك استاذ أحمد.
    مجهود طيب
    وانا شخصيا متابع لشرح الفصول معك وبعدين رح أبدا في الكتاب ان شاء الله.

    1. Ahmad Elmiligy
      Ahmad Elmiligy يقول:

      متشكر جدًا يا أستاذي. ربنا ينفع بيه 🙂

  2. المتشائل يقول:

    ما كل هذا الجمال … هذه واحدة من أجمل مراجعات الكتب التي قرأتها إطلاقاً.. باللهجة المصرية الجميلة.. أسجل حضوري هنا لأتابع باقي الحلقات 😀

    1. Ahmad Elmiligy
      Ahmad Elmiligy يقول:

      متشكر جدًا. منورني 🙂

اترك رداً على أحمد دراغمة

لن يتم نشر عنوان بريدك الإلكتروني. الحقول الإلزامية مشار إليها بـ *