تسجيل
مراجعة كتب, مقال, مميز

الكلام الكبير في كتاب الأب الغني والأب الفقير – مراجعة مرحة (حلقة 9)

وقت القراءة : 7 د
قُرِأ النص 462 مرة
0 تعليقات

صباح الشيكولاتة بالنعناع اللي بتتباع فى أيكيا :-)، دي المقالة رقم 9 من سلسلة “الكلام الكبير اللي فى كتاب الأب الغني والأب الفقير“.

التطور الطبيعي للأشياء وسر شويبس، إن سعتك لو مشربتش من نيلها، بلاش تجرب وتغني لها و باقي الحاجات اللي كانت في الأغنية مش فاكر بتقول ايه.

الحاج براين بن أدامز اللي مشربش من نيلها! بتوع المطار علموا ع الجيتار بتاعه بقلم اخضر خراوي، وفى الغالب مش بيطلع. فزعل وقفش. مش دى المشكلة برده ومش غريب.

المشكلة انه كان جاى يغني لها!

أنا بقى يا معلم، شربت من نيلها، وزمان كذا مرة جربت أغني لها، بس على أنغام دقدقة ورش الميكانيكية وبتوع الروبابيكيا والعيال اللي بتسب الدين فى شارعنا فى شبرا.

جربت أغني لها أغنية “أنا حخلعRunning Free لأسطورة الهارد الروك أيرون مايدن Iron Maiden

جربت أغني لها أغنية “حقضيهاI will survive لسيدة الغناء الغربى جلوريا جاينور Gloria Gaynor

وكمان فكرت أغنيلها “أحنا الشباب حنكسر الدنياYouth Gone Wild لوحوش ميتال الـتمانينات سكيد رو Skid Row

بس قلت ملوش لازمة. لأنى شايف الموضوع من منظور تاني! مش بكسب اللي بتكسبه شيرين أو حد من المغنواتيه المايصين بتوع السبوبة والهلس. وبرده الحمد لله حالي وحالك احسن من ناس كتير!

قلت يا عم خليك فى القراية والشغل ولعب المكعبات مع ابني الصغير. ولأن أصلاً الزعل والقهرة مش حيغير كلمة “مصري” ومش حيأكلك عيش. ربنا هو اللي خلقنا هنا ياعم! الحل الوحيد إنك تشتغل وتتعلم وتفكر إزاي تنفع الناس والبلد حتى لو مش مبسوط فيها. المنفعة حتلف تلف…وترجع لك.

ووالله مصر والبلاد العربية فيها شباب وبنات زى اللوز برده! زى م فيها بقايا كائنات عايشين فى المدينة بعقل الأرياف من 100 سنة فاتوا، بالإضافة مع بقايا بشرية من مخلفات مدبحة القلعة والحرب العالمية.

حينقرضوا م تقلقش!

نرجع للعقول المستحمية بقى! في بعد تاني، ومكان تانى، كلمت سعتك المرة اللى فاتت عن الكنج مستر أيلون ماسك Elon Musk اللي أصله جنوب أفريقي. وإستوحوا منه شخصية أيرون مان Iron Man!

art9_side

لو مش بتعرف إنجليزى، يبقى إيزي! حدي لك نفحة عن هذا البوب الخارق:

  • مواليد 71، وهو عنده 8 سنين، قرا دايرة المعارف البريطانية Encyclopedia Britannica كلها، وكان بيقضي 10 ساعات من يومه فى المكتبه….مش بيلعب كورة أو بيتفرج على كرتون!!
  • “علم نفسه” البرمجة وهو عنده 10 أو 12 سنة، وعمل أول لعبة كومبيوتر وباعها بـ 500 دولار.
  • سافر كندا ودخل جامعة ودرس هندسة وفيزيا وحوارات تانية و”مكنش همه يظبط مُزز” أو يخلع بس من جنوب أفريقيا.
  • وفي 92 أسس شركة Zip2 لخدمات البزنس والخرايط على النت هو وأخوه. بعدين كومباك اشتروها منه وطلع بـ 22 مليون دولار بس فى 99. فشهيص نفسه بعربية ماكلارين تمنها مليون دولار. براحته، عندك مانع؟
  • بعد فترة نزل على أمريكا، خد من الـ 22 مليون دول 10 مليون وأسس شركة خدمات مالية على الإنترنت إسمها X.com، اللي بعد كدة كبرت وترعرعت ودخلت في أسطورة الخدمات المالية باى بال Pay Pal، بس بعد كدة بعض شركاءه نطروه منها عشان كان عايز يشغل السايت على ويندوز ودماغه ناشفة، وهو فى شهر العسل عملوا معاه الجلاشة وطردوه من باى بال…باى باى!!
  • وهو حاطط فلوس فيها كمستثمر فى 2002 جاله طفل، بس مات فجأه وهو عنده 10 شهور. وبعدها بشهرين ولا حاجة إيباى eBay اشتروا باى بال. والنجم قفش فى ايده حوالي 165 مليون دولار نصيبه.
  • فضل يقرا كتب عن أبحاث الفضاء وصناعة الصواريخ. وأسس بـ 100 مليون دولار شركة سبيس إكس Space X، اللي فيها حوالى 5000 موظف. بيعملوا إيه يا عمو؟ لا ولا حاجة، دول بس شغالين فى دار “الفضاء” العالى بيعملوا صواريخ وينافسوا وكالة الفضاء الأمريكية – ناسا NASA! حاول كذا مرة يطلع صواريخ وتبوظ منه واللي يقع واللي يولع فى الجو…فضل مكمل ودفع من جيبه لحد لما طلع الصواريخ برده، ومشغل خط من العتبة لحد المريخ بالنفر 🙂
  • في 2003 أسس تسلا موتورز Tesla Motors عشان ينتج عربيات سريعة بالكهربا. وعنده قناعة تامة إن البترول وأشياءه حيخلصوا من على الأرض والعربية اللي بالكهربا هى اللى حتكسب. الشركة فيها حوالي 6000 موظف. أول موديل ليها كان بـحوالي 100 الف دولار. فضل يطور ويحاول يقلل تكلفتها لحد لما عمل آخر موديل ووصل تمنه لحوالي 30 الف دولار. ومحطات الشحن ببلاش طول الحياه.

هـاه؟ شاري بالقسط؟ هات بقى جواب إتش آر وضمان من 2 موظفين وإبقى قابلنى أخلص لك مع تسلا موتورز بدل البنك 🙂

  • فى النص راح شغال في الطاقة النظيفة، وشارك فى تأسيس شركة اسمها سولار سيتي SolarCity، بيبيعوا أنظمة طاقة شمسية وفيها 13 الف موظف.
  • عنده كام شركة تاني وأبحاث وحوارات مش وقتها دلوقتى عشان صحتك!

عقدتنا ليه بس يا عم؟ ايه علاقة ده بالمعلم كيوساكي وكلامه الكبير؟!

أقول لسعتك. ممكن يا عم متقراش دائرة المعارف البريطانية ولا نيلة. بس شوف التطور الطبيعي للشاب الغني فحت الفحت، اللى مظنش ناس كتير فى بلادنا عارفينه زى م يعرفوا أليسا وتمور وعادل أمام ونيشان…اللي مش بنسمع كتير عن حفلاته الراقصة ولا مغامراته وعلاقاته العاطفية. البرنس ده أصلا مش فاضي للهجايص! خرج من بزنس خش فى التاني، ذاكر وقرا عشان يخش في اللي بعده، خد نفحة من مكسبه فى شركة وفتح اللي بعدها. فشل في حاجة وطردوه من شركاته وقلو معاه. عمل غيرها وطلع كسبان… الكنج كنج!

مش لازم يا عم تكون إنت الأيرون مان…خليك بس “مان“. فهمت؟

نكمل الفصل التالت في البوست اللي جاى ان شاء الله.

فل عليكم 🙂

#الكلام_الكبير
#الأب_الغني_و_الأب_الفقير
#الكلام_الكبير_اللي_في_كتاب_الأب_الغني_و_الأب_الفقير

ساعد الكاتب في تطوير مهاراته الكتابية

نُشرت بواسطة Ahmad Elmiligy

Ahmad Elmiligy

A time traveler, i belong to no age! i write, i design, i teach, i travel, and i rule my planet.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *